1ܒܢܘܿܢܹ̈ܐ؛ ܡܲܨܝܸܬܘܿܢ ܠܒܵܒܵܘܵܬܵܘ̈ܟܼܘܿܢ ܒܡܵܪܲܢ؛ ܣܵܒܵܒ ܕܐܵܗܵܐ ܗܲܩ ܝܼܠܵܗ̇. 2ܥܒܼܘܿܕ ܐܝܼܩܵܪܵܐ ܠܒܵܒܘܼܟܼ ܘܠܝܸܡܘܼܟܼ؛ ܕܝܼܠܹܗ ܦܘܼܩܕܵܢܵܐ ܩܵܕ݇ܡܵܝܵܐ ܥܲܡ ܩܵܘܠܵܐ؛ 3ܕܗܵܘܝܵܐ ܠܘܼܟܼ ܗ̇ܝ ܕܝܼܠܵܗ̇ ܨܦܵܝܝܼ؛ ܘܝܵܪܟܼܝܼ ܚܲܝܘܼ̈ܟܼ ܥܲܠ ܐܲܪܥܵܐ. 4ܘܒܵܒܵܘܵܬܹ̈ܐ؛ ܠܵܐ ܡܲܟܪܸܒ݁ܝܼܬܘܿܢ ܠܝܵܠܵܘ̈ܟܼܘܿܢ؛ ܐܸܠܵܐ ܓܲܪܘܸܣܘܿܢ ܠܗ݇ܘܿܢ ܒܬܲܥܠܲܡܬܵܐ ܘܒܝܘܼܠܦܵܢܵܐ ܕܡܵܪܲܢ. 5ܪܹ̈ܓܵܘܵܬܹܐ؛ ܡܲܨܝܸܬܘܿܢ ܠܐܵܓܼܵܝܵܘ̈ܟܼܘܿܢ ܕܒܒܸܣܪܵܐ؛ ܒܙܕܘܼܥܬܵܐ ܘܒܪܲܬܪܲܬܬܵܐ؛ ܘܒܦܫܝܼܛܘܼܬܵܐ ܕܠܸܒܵܘܟܼܘܿܢ؛ ܐܲܝܟܼ ܕܠܡܫܝܼܚܵܐ؛ 6ܠܵܐ ܒܚܙܵܝܬܵܐ ܕܥܲܝܢܵܐ؛ ܐܲܝܟܼ ܫܵܦܪ̈ܵܢܹܐ ܠܒܢܲܝ̈ܢܵܫܵܐ؛ ܐܸܠܵܐ ܐܲܝܟܼ ܪܹ̈ܓܵܘܵܬܹܐ ܕܡܫܝܼܚܵܐ ܕܥܵܒܼܕܝܼ ܪܸܙܵܝܹܗ ܕܐܲܠܵܗܵܐ ܡ̣ܢ ܠܸܒܵܐ؛ 7ܘܥܒܼܘܿܕܘܿܢ ܠܗ݇ܘܿܢ ܚܸܠܡܲܬ ܒܚܘܼܒܵܐ؛ ܐܲܝܟܼ ܕܠܡܵܪܲܢ ܘܠܵܐ ܐܲܝܟܼ ܕܠܒܢܲܝ̈ܢܵܫܵܐ؛ 8ܟܲܕ ܝܲܕܥܝܼܬܘܿܢ ܕܗ̇ܘ ܡܸܢܕܝܼ ܫܵܦܝܼܪܵܐ ܕܥܵܒܼܸܕ ܐ݇ܢܵܫܵܐ؛ ܗܲܪ ܗ̇ܘ ܟܹܐ ܦܵܝܸܫ ܦܸܪܥܝܵܐ ܡ̣ܢ ܡܵܪܲܢ؛ ܐܸܢ ܪܹܓܵܐ ܘܐܸܢ ܐܵܙܵܕ. 9ܐܘܼܦ ܐܲܚܬܘܿܢ؛ ܐܵܓܼܵܝܹ̈ܐ؛ ܗܲܕܟܼܵܐ ܥܒܼܘܿܕܘܿܢ ܐܸܠܵܝܗܝ؛ ܒܸܫܠܵܝܵܐ ܡ̣ܢ ܓܸܙܡܹ̈ܐ؛ ܣܵܒܵܒ ܒܝܼܕܲܥܝܵܐ ܝܬܘܿܢ ܕܡܵܪܵܐ ܕܐܵܢܝܼ ܘܕܝܼܵܘܟܼܘܿܢ ܒܫܡܲܝܵܐ ܝܠܹܗ؛ ܘܚܙܵܝܬܵܐ ܕܦܵܬܵܐ ܠܲܝܬ ܠܟܸܣܠܹܗ. 10ܡܐܵܕܝܼܵܐ؛ ܐܵܚܘܿܢܘܵܬܝܼ̈؛ ܚܲܠܸܢܘܿܢ ܒܡܵܪܲܢ؛ ܘܒܙܲܪܒ ܕܚܲܝܠܹܗ. 11ܠܒܼܘܿܫܘܿܢ ܟܠܹܗ ܟ̰ܲܟܵܐ ܕܐܲܠܵܗܵܐ؛ ܕܡܵܨܝܼܬܘܿܢ ܠܸܟܠܵܝܵܐ ܩܵܕ݇ܡ ܦܲܢܕܹ̈ܐ ܕܐܵܟܼܹܠܩܲܪܨܵܐ. 12ܣܵܒܵܒ ܦܠܵܫܵܘܟܼܘܿܢ ܠܹܐ ܝܠܹܗ ܥܲܡ ܕܸܡܵܐ ܘܒܸܣܪܵܐ؛ ܐܸܠܵܐ ܥܲܡ ܐܲܪ̈ܟܘܿܣ ܘܥܲܡ ܫܘܼܠܛܵܢܹ̈ܐ؛ ܘܥܲܡ ܕܵܒܼܩܵܢܹ̈ܐ ܕܥܵܠܡܵܐ ܕܐܵܗܵܐ ܚܘܼܒܼܝܵܐ؛ ܘܥܲܡ ܪ̈ܘܼܚܵܬܹܐ ܒܝܼܫܹ̈ܐ ܕܬܚܘܿܬ ܫܡܲܝܵܐ. 13ܣܵܒܵܒ ܕܐܵܗܵܐ ܠܒܼܘܿܫܘܿܢ ܟܠܹܐ ܟ̰ܲܟܵܐ ܕܐܲܠܵܗܵܐ؛ ܕܡܵܨܝܼܬܘܿܢ ܟܵܠܝܼܬܘܿܢ ܕܲܪܩܘܼܒܼܠ ܒܝܵܘܡܵܐ ܒܝܼܫܵܐ؛ ܘܟܲܕܼ ܥܒܸܕܠܵܘܟܼܘܿܢ ܟܠ ܡܸܢܕܝܼ؛ ܕܟܵܠܝܼܬܘܿܢ. 14ܟܠܹܝܡܘܿܢ ܗܲܕܟܼܵܐ؛ ܘܚܠܘܿܨܘܿܢ ܚܵܨܵܘܟܼܘܿܢ ܒܣܲܪ̈ܣܬܘܼܬܵܐ؛ ܘܠܒܼܘܿܫܘܿܢ ܓܲܝܸܡܟ̰ܵܪܵܐ ܕܙܲܕܝܼܩܘܼܬܵܐ؛ 15ܘܠܒܼܘܿܫܘܿܢ ܒܐܲܩܠܵܘ̈ܟܼܘܿܢ ܗܕܵܪܹܗ ܕܐܹܘܵܢܓܵܠܝܼܘܿܢ ܕܫܠܵܡܵܐ؛ 16ܘܥܲܡ ܟܠܵܝܗܝ؛ ܫܩܘܿܠܘܿܢ ܠܵܘܟܼܘܿܢ ܡܲܛܵܠܵܐ ܕܗܲܝܡܵܢܘܼܬܵܐ؛ ܘܒܝܼܵܗ̇ ܡܵܨܝܼܬܘܿܢ ܠܡܲܟ̰ܡܘܼܝܹܐ ܟܠܵܝܗܝ ܓܹܐܪܹ̈ܐ ܠܲܗ݇ܝܵܢܹ̈ܐ ܕܒܝܼܫܵܐ. 17ܘܫܩܘܿܠܘܿܢ ܬܲܣܟܸܠܵܘ ܕܦܘܼܪܩܵܢܵܐ؛ ܘܣܲܝܦܵܐ ܕܪܘܼܚܵܐ؛ ܕܝܼܠܹܗ ܗܹܡܸܙܡܵܢ ܕܐܲܠܵܗܵܐ؛ 18ܘܒܟܠܵܝܗܝ ܨܠܵܘܵܬܹ̈ܐ ܘܦܲܪ̈ܦܲܠܝܵܬܹܐ ܨܵܠܹܡܘܿܢ ܒܟܠ ܙܲܒܼܢܵܐ ܒܪܘܼܚܵܐ؛ ܘܗܲܪ ܒܐܵܗܵܐ ܗܵܘܝܼܬܘܿܢ ܒܸܥܒܼܵܕܵܐ ܫܵܗܲܪܬܵܐ ܒܟܠ ܚܡܵܠܬܵܐ ܘܦܲܪܦܲܠܬܵܐ ܡܒܵܕܵܠ ܕܟܠܵܝܗܝ ܩܲܕܝܼܫܹ̈ܐ؛ 19ܐܘܼܦ ܡܒܵܕܵܠ ܕܝܼܝܼ؛ ܕܦܵܝܫܵܐ ܝܘܼܗَܒܼܸܠܬܵܐ ܐܸܠܝܼ ܗܹܡܸܙܡܵܢ ܒܦܬܵܚܬܵܐ ܕܦܘܼܡܝܼ؛ ܕܒܓ̰ܘܼܪܐܲܬ ܡܲܟܪܸܙܸܢ ܣܸܪ ܕܐܹܘܵܢܓܵܠܝܼܘܿܢ؛ 20ܗ̇ܘ ܕܐܵܢܵܐ ܐܲܝܠܟ̰ܝܼܹܗ ܝܘܸܢ ܒܫܸܫ̈ܠܵܬܵܐ؛ ܕܒܒܸܣܬܵܝܘܼܬܵܐ ܗܲܡܙܸܡܸܢܹܗ؛ ܐܲܝܟܼ ܕܝܼܠܵܗ̇ ܘܵܓ̰ܸܒ ܐܸܠܝܼ ܠܗܲܡܙܘܼܡܹܗ. 21ܐܝܼܢܵܐ ܕܝܲܕܥܝܼܬܘܿܢ ܐܘܼܦ ܐܲܚܬܘܿܢ ܡܸܢܕܝܼܵܢܹ̈ܐ ܕܠܟܸܣܠܝܼ؛ ܘܕܵܐܟܼܝܼ ܒܸܗ݇ܘܵܝܵܐ ܝܘܸܢ؛ ܒܸܬ ܡܲܕܸܥ ܠܵܘܟܼܘܿܢ ܟܠܵܝܗܝ ܛܘܼܟܼܝܼܩܘܿܣ؛ ܐܵܚܘܿܢܵܐ ܡܘܼܚܸܒܵܐ ܘܚܸܠܡܲܬܟܵܪ ܡܗܘܼܡܢܵܐ ܒܡܵܪܲܢ؛ 22ܕܐܹܠܹܗ ܫܘܼܕܸܪܝܼ ܠܟܸܣܠܵܘܟܼܘܿܢ ܗܲܪ ܣܵܒܵܒ ܕܐܵܗܵܐ؛ ܕܝܲܕܥܝܼܬܘܿܢ ܡܸܢܕܝܼ ܕܠܟܸܣܠܲܢ؛ ܘܕܝܵܗ݇ܒܸܠ ܠܸܒܵܐ ܠܠܸܒܵܘܵܬܵܘ̈ܟܼܘܿܢ. 23ܫܠܵܡܵܐ ܥܲܡ ܐܵܚܘܿܢ̈ܘܵܬܲܢ؛ ܘܚܘܼܒܵܐ ܥܲܡ ܗܲܝܡܵܢܘܼܬܵܐ؛ ܡ̣ܢ ܐܲܠܵܗܵܐ ܒܵܒܵܐ؛ ܘܡ̣ܢ ܡܵܪܲܢ ܝܼܫܘܿܥ ܡܫܝܼܚܵܐ. 24ܫܵܦܵܩܲܬ ܥܲܡ ܟܠܵܝܗܝ ܐܵܢܝܼ ܕܡܲܚܸܒܝܼ ܠܡܵܪܲܢ ܝܼܫܘܿܥ ܡܫܝܼܚܵܐ ܒܠܵܐ ܚܪܵܒܼܵܐ؛ ܐܵܡܹܝܢ.